Frakton
Besnik Krapi, aktor dhe producent filmi është emëruar të premten, me 23 nëntor, Drejtor i Prishtina Film Forum – plaformës regjionale të industrisë së filmit në kuadër të PriFest – Prishtina International Film Festival. Ky vendim erdhi nga menaxhmenti i PriFest pasi Fatos Berisha, Kryesuesi i deritashëm i PriFORUM vendosi që të tërhiqet nga kjo pozitë për të vazhduar angazhimin e tij në zhvillimin e pjesës artistike të festivalit duke mbetur Drejtor Artistik i tij. Berisha e lë këtë pozitë pas një udhëheqje 10 vjecare që me sukses arriti t’a ngris PriFORUM në një platformë të rëndësishme për industrinë e filmit në Kosovë dhe rajon që ofron shumë përkrahje dhe është shndërruar në një vendtakim të rëndësishëm për filmbërësit Kosovar me përfaqësues të industrisë së filmit nga rajoni dhe Europa.
Vjosa Berisha, Drejtor Gjeneral i PriFest tha: “- Gëzohem që Besniku iu bashkua ekipit të PriFest duke marrë një përgjegjësi që të udhëheq një seksion të rëndësishëm të PriFest. Besniku ka qenë përkrahës i madh dhe mik i PriFest që nga fillimi. Duke qenë se kam punuar në projekte të tjera me te më parë, e njoh profesionalizmin e tij, vizionin dhe ambicjen. Kjo më bën konfidente që PriFORUM do të jetë në duart e një personi kompetent që do të vazhdojë të ndërtojë një rrugë të suksesshme për PriFORUM ashtu siç ka qenë nën menaxhimin e Fatosit deri tani. I gëzohem punës që do t’a bëjmë së bashku në PriFest si ekip duke ndarë idetë për ndërtimin e mëtutjeshëm të kësaj platforme industriale dhe duke realizuar një festival të suksesshëm që luan rol të rëndësishëm për shtetin tonë të ri dhe industrinë e filmit.”
Besnik Krapi ndihet i lumtur dhe I gatshëm të marrë detyrën e re: “- Më duhet të them se përveç se jam i nderuar me ftesën për të qenë udhëheqës i PriForum jam jashtëzakonisht i kënaqur dhe në të njejtën kohë ndjej përgjegjësi të madhe për angazhimin tim në këtë pozitë. E them këtë sepse PriFest e në veçanti PriForum ka qenë dhe është një ndër faktorët e rëndësishëm në zhvillimin e industrisë tonë duke ofruar program, ekspertë dhe një derë të cilën Kosova dhe filmbërësit Kosovar e kane mëse të nevojshme për shkak të limiteve në perfaqësimin e prodhimit tonë ndërkombëtarisht. Shpresoj që me punën dhe kapacitetet e mia do të mund të kontriboj mjaftueshëm në rrugën të cilën Vjosa dhe Fatosi e kane filluar dhe arritën t’a ndërtojnë për një dekadë edhe përkundër vështirësive që i kanë pasur vazhdimisht. Shihemi në edicionin e 11të të PriFest i cili që tani duket se do të ketë mjaft risi dhe mundësi për filmbërësit vendor por dhe nga regjioni.”
Fatos Berisha i gëzohet ardhjes së Besnikut në udhëheqje të PriFORUM: “- Jam i lumtur që po ia dorëzoj detyrën e udhëheqjes së Prishtina Film Forum-it një kineasti i cili e njeh mirë industrinë filmike të vendit dhe rajonit, dhe i cili, jam i bindur se me energjinë dhe idetë e reja do të shtyej përpara këtë platformë regjionale filmike.”
E udhëhequr me sukses për 10 vite nga Fatos Berisha, platforma regjionale e zhvillimit të industries së filmit - PriFORUM është zhvilluar në kuadër të PriFest, duke u shndërruar në vendtakimin kryesor për filmbërësit, aktorët dhe profesionistët tjerë të industrisë së filmit nga Kosova dhe rajoni. Duke u pasuruar çdo vit me aktivitete, workshope, masterklasa, trajnime, dhe duke sjellur shumë ekspert ndërkombëtar të industrisë së filmit në Kosovë. PriFORUM ka arritur të bëhet një pjesë e rëndësishme e festivalit PriFest që ofron shumë përkrahje dhe mundësi promovimi ndërkombëtar për industrinë e fimit në Kosovë.
Edicioni i 11-të i PriFest do të mbahet në korrik 16-22, 2019.
Biografia e Besnik Krapit
Besnik Krapi është njëri nga producentët më premtues në Kosovë. Në 2010 ai themeloi kompaninë e tij të produksionit të filmit duke prodhuar filma të shkurtër, dokumentarë dhe së fundi ka përfunduar filmin e tij të parë të metrazhit të gjatë “Fusha e mëllenjave” (prodhim i Kosovës me bashkëprodhues Britaninë e Madhe dhe Shqipërinë). Momentalisht është në fazën e zhvillimit të filmit të dytë të metrazhit të gjatë “Looking for Venera” nga Norika Sefa. Besniku ka punuar ne shumë bashkëprodhime në rajon dhe jashtë, përfshirë këtu filmin “Shok” të nominuar për Oskar nga Jamie Donoughue. Si producent i ri ka arritur të punojë me shumë regjisor të njohur përfshirë këtu Isa Qosja (Skype), Jamie Donoughue (Shok), Blerta Zeqiri (Martesa), Fatos Berisha (Cirku Fluturues), Florenc Papas (Open Door), Antoneta Kastrati (Zana), Edon Rizvanolli (Unwanted).
